19 мая 2021 года ў ДУА “Засульская сярэдняя школа” Стаўбцоўскага раёна Мінскай вобласці адбылося мерапрыемства, прымеркаванае да Дня славянскай пісьменнасці і культуры, якое арганізавана ў межах супрацоўніцтва паміж НАН Беларусі і БПЦ.
![](http://oroik.by/wp-content/uploads/2021/05/1-1.jpg)
У мерапрыемстве бралі ўдзел намеснік начальніка ўпраўлення па адукацыі, спорту і турызму Стаўбцоўскага райвыканкама Ірына Мікалаеўна Язвінская; кандыдат філалагічных навук, дацэнт, загадчык аддзела гісторыі беларускай мовы Цэнтра даследаванняў беларускай культуры, мовы і літаратуры Нацыянальнай акадэміі навук Беларусі (філіял “Інстытут мовазнаўства імя Якуба Коласа”) Наталля Вікенцьеўна Паляшчук; дырэктар Цэнтра праваслаўнага краязнаўства і нацыянальнай культуры (далей – Цэнтр) Зоя Іванаўна Падліпская, спецыяліст Цэнтра Ларыса Іванаўна Пшанічная і настаяцель храма Раства Іаана Прадцечы ў вёсцы Засулле Стаўбцоўскага раёна протаіерэй Іаан Ляшкевіч. Вяла мерапрыемства дырэктар школы Валянціна Іванаўна Кухарчык.
![](http://oroik.by/wp-content/uploads/2021/05/2-1-225x300.jpg)
Падчас мерапрыемства Валянціна Іванаўна пазнаёміла прысутных з прыярытэтнымі задачамі ўстановы адукацыі, якую ўзначальвае, а таксама распавяла пра дзейнасць раённага рэсурснага Цэнтра па духоўна-маральным і сямейным выхаванні навучэнцаў, што створаны на базе ДУА “Засульская сярэдняя школа” і асноўнай мэтай дзейнасці якога з’яўляецца абагульненне і распаўсюджванне эфектыўнага педагагічнага вопыту па накірунках духоўна-маральнага і сямейнага выхавання навучэнцаў на хрысціянскіх каштоўнасцях і традыцыях беларускага народа.
![](http://oroik.by/wp-content/uploads/2021/05/3-1.jpg)
Наталля Вікенцьеўна Паляшчук прадставіла прысутным факсімільныя выданні рарытэтных кніг – гістарычных каштоўнасцей Беларускай Праваслаўнай Царквы: Слуцкага Евангелля, “Жыція Еўфрасінні Полацкай”, “Буквара” Спірыдона Собаля (выданні падрыхтаваны пры ўдзеле мовазнаўцаў НАН Беларусі і ўбачылі свет у выдавецтве Беларускага Экзархата).
![](http://oroik.by/wp-content/uploads/2021/05/3а-225x300.jpg)
Наталля Вікенцьеўна падрабязна расказала гісторыю стварэння помнікаў пісьменнасці, распавяла пра дзейнасць вучоных Цэнтра даследаванняў беларускай культуры, мовы і літаратуры Нацыянальнай акадэміі навук Беларусі па стварэнні іх факсімільных копій і выказала спадзяванне, што такія кнігі-скарбы будуць садзейнічаць далучэнню маладога пакалення да здабыткаў гісторыка-культурнай спадчыны Беларусі, развіццю лінгвакультуралагічнай кампетэнцыі вучняў, фарміраванню ў іх камунікатыўнай, духоўна-маральнай і грамадзянскай культуры.
![](http://oroik.by/wp-content/uploads/2021/05/4-1.jpg)
Дырэктар Цэнтра праваслаўнага краязнаўства і нацыянальнай культуры Зоя Іванаўна Падліпская пазнаёміла прысутных з дзейнасцю Цэнтра, падрабязна спыніўшыся на кожным з пяці накірункаў: “Праваслаўныя храмы”, “Праваслаўная гісторыя ў асобах”, “Турыстычныя маршруты па святых мясцінах Беларусі”, “З гісторыі ўласнага роду”, “Імёны. Падзеі. Памяць”, і выказала спадзяванне на далейшае супрацоўніцтва з Засульскай сярэдняй школай, дзе значная ўвага надаецца вывучэнню гісторыі праваслаўя ў роднай мясцовасці. Зоя Іванаўна адзначыла, што гэтаму, без сумневу, спрыяе адноўлены на тым жа падмурку і асвечаны ў 2010 годзе храм Раства Іаана Прадцечы (пабудаваны ў Засуллі ў 18 ст. і разабраны савецкай уладай у 1960-я гг.), а таксама шчырае служэнне Богу і людзям настаяцеля храма протаіерэя Іаана Ляшкевіча.
![](http://oroik.by/wp-content/uploads/2021/05/4а.jpg)
Спецыяліст Цэнтра Ларыса Іванаўна Пшанічная адзначыла важнасць даследчай і творчай працы, што праводзіцца вучнямі Засульскай сярэдняй школы ў галіне краязнаўства, і ўхваліла дзейнасць школьных аб’яднанняў па інтарэсах; на ўласным прыкладзе, распавёўшы пра даследаванне гісторыі свайго роду да 1720 года, заахвоціла навучэнцаў да вывучэння сямейных радаводаў, звярнуўшы ўвагу на выхаванне павагі да сваёй Айчыны праз вывучэнне гісторыі сваёй сям’і.
![](http://oroik.by/wp-content/uploads/2021/05/5-1.jpg)
Протаіерэй Іаан Ляшкевіч падзякаваў навучэнцам і кіраўніцтву Засульскай сярэдняй школы за важную працу ў галіне праваслаўнага краязнаўства, плённае супрацоўніцтва ўстановы адукацыі і прыхода храма Раства Іаана Прадцечы, выхаванне навучэнцаў у павазе да народных традыцый і веры продкаў.
![](http://oroik.by/wp-content/uploads/2021/05/6-1.jpg)
За руплівую працу на карысць Айчыны протаіерэй Іаан Ляшкевіч, настаяцель храма Раства Іаана Прадцечы ў в. Засулле, і дырэктар Засульскай сярэдняй школы Валянціна Іванаўна Кухарчык узнагароджаны Падзякай Беларускай Праваслаўнай Царквы. Узнагароды ўручыла Зоя Іванаўна Падліпская.
![](http://oroik.by/wp-content/uploads/2021/05/7-1.jpg)
![](http://oroik.by/wp-content/uploads/2021/05/8-1.jpg)
Госці прэзентавалі ў школьную бібліятэку ўласныя кнігі з дарчымі надпісамі.
Завяршылася мерапрыемства цудоўным канцэртам навучэнцаў Засульскай сярэдняй школы, удзельнікаў аб’яднанняў па інтарэсах “Ноткі” (кіраўнік – педагог дадатковай адукацыі Люсьена Валер’еўна Мурзіч) і “Жывое слова” (кіраўнік – педагог дадатковай адукацыі Таццяна Мікалаеўна Гарановіч).
![](http://oroik.by/wp-content/uploads/2021/05/9-1.jpg)
![](http://oroik.by/wp-content/uploads/2021/05/10-1.jpg)